Chin State chhim lam. Matupi khawpui luh chhuahna Gate-ah Military Council sipai ten kawng an dang chat vek a, bungraw phurh luh a awm tawh loh avangin ei chawp thil man a sang chho zel a, ei leh in an chatlak thu hriat a ni.
“Tunah rih chuan kawng an khar tawp a, kan neihsa kan la lei hram hram a. Khaw pawn kan chhuak thei bawk si lo. Tun chawlhkar leh, kar leh thleng an khar zel chuan Petrol hman tur kan nei tawh lovang” tiin Matupi khawpuia tualchhung mi pakhat chuan a sawi.
September 19 atang khan Military Council sipaite leh CDF-Matupi-te an inkah hnuah Military Council sipai ten Matupi khawpui luh chhuahna kawng an khar vek avangin zin veivak leh bungraw phur te an khar vek bawk.
Matupi khawpui luh chhuahna kawng 3, Matupi khawpui leh Mindat khawpui, Matupi khawpui leh Halkha khawpui leh Matupui khawpui leh Paletwa khawpui inkal pawhna zawng zawng an khar vek a, Military Council sipai ten, mi tu mah kal tlang an phal lo bawk.
Military Council sipai ten Matupi khawpui chhehvelah Camp an siam nual a, khaw pawn thlengin Flag sen an phun thluah thu hriat a ni.
Chin State chhim lam, Matupi township hi Geography zawngin emaw, operation hmun zawngin emaw leh Chin State-a hmun laili ber a nih avangin Military Council sipai ten Buk khuar nan an hmang a, Military Council sipai Battalion 2 ten awmhmun an khuar mek.
Military Council sipaite leh CDF-Matupi te, September 19,24,25,27 leh 29 khan an inkap a. He inkahnaah hian Military Council sipai 19 an thi a, CDF-Matupi sipai pakhat a boral thu hriat a ni.
