Chin State, Thantlang township Khuafo khuaah March 30 khan Military council sipai ten Jet Fighter-in an bomb-naah naupang 2 telin tualchhung mipui 8 an boral a, mi 20 chuang an hliam thu CNF thupuangtu Salai Thet Ni chuan a sawi.
Thlantlang khawpui atanga mel 3 vela hla Khuafo khuaah March 30 zing dar 10:00 vel khan khawmualah inkah buaina awm lovin Military council sipai ten Jet Fighter leh Mi35 Helicopter hmangin an bomb thu hriat a ni.
CNF thupuangtu Salai Thet Ni chuan “Military council sipai ten Jet Fighter leh Mi35 bomb Thlawhnain vawi 9 a bomb a. Kan hriat dan hnuhnung berah chuan tualchhung mipui 8 an boral a, hliam 20 chuang an awm a, In thenkhat a kang mek a. Inkah buaina awm lovin Military council sipai ten an bomb ringawt” tiin Khonumthung Media a hrilh a ni.
Military council sipai ten an bomb-naah kum 6 mi leh kum 9 mi naupang 2 leh hmeichhe 5 an boral thu hriat a ni a, hliam zingah kum 9 leh kum 10 mi naupang 2 an tel thu hriat a ni a. Heng boral te zingah hian Kohhran upa Za Maung-a fanu 2 leh a tu, an tel thu hriat a ni a; boral ta te hi Pi Ngun Dawt, Pi Sung Hlei, Pi Len Zi, Sophia, Pu Siang Cung Bik, Pu Van Duh, Pu Kep Lian, Pu Cung Hlei te an ni.
Military council sipai ten an beihna hi mipui te an tinzawn ber a ni tiin Salai Thet Ni chuan a sawi.
“Khawchhung an beihna chhan nia lang chu PDF leh ralthuam keng pawl te an awm vang nia hriat a ni a. He khuaah hian CDF leh PDF te an awm lova, beihna tham a ni lo, mipui tinzawnin an bei lui a ni” tiin Salai Thet Ni chuan a sawi a ni.
March 27 khan Armed Forces Day 78-naah Military council puipa General Min Aung Hlaing chuan NUG leh PDF tanpuitu EAO te chungah action a lak tur thu leh a vau thu an puan hnuah CNF huam chhung Thantlang township-a Khaw pakhat an bomb a ni.
Military council sipai ten Chin State-ah khawmual lam aiin chung lam Thlawhnain an bei nasa hle a. Kumin 2023 January thla atangin February, thla 2 chhung khan chung lam Thlawhna beihna vawi 100 chuang an tawk tawh a ni.
