Chin State, Falam leh Halkha khaw inkara awm Tlangzar khuaah April 3 khan Military council sipai ten chenna in 6 lai an halchhiat thu hriat a ni a.
Falam khua atanga Halkha khawpui pan mek Military council sipaite leh CDF pawl te Tlangzar khaw bulah April 4, zing dar 1:00 atangin chhun dar 12:00 thleng an inbeih hnuah Military council sipai ten Tlangzar khuaa chenna in an hal nual thu CDF sipai pakhat chuan heti hian a sawi.
“CDF te nen kan inhmachhawn a, kan inbei nasa khawp mai. Falam khua atangin Laipuiin min rawn sai chiam a, In 6 vel chu a bomb chhia mai thei, a zat chiah kan hre lo. An bul hnaiah kan kal ngam lo” tiin CDF hmatawng sipai pakhat chuan a sawi.
April 1 khan Military council sipai ten ralthuam lian an kah avangin Falam khua atanga mel 10 vela hla In 20 awmna Tlangrawn khua an bomb a, In chung rangva leh bang a chhiat nual thu tualchhung mi te hnen atanga hriat a ni.
March 9 pawh khan Sagaing region, Kalaymyo atanga Chin Hill pan mek Military council sipaite, Falam township Thlanrawn khua leh Tlangzar khua an thlenin CDF te nen an inkah thu hriat a ni bawk.
“An rawn chhohna chawlhkar 3 a ni tawh. An kalna kawngah kan inzar pharh vek a, an hlau khawp mai. April 4, zing dar 4:00 atang khan ralthuam lian leh te an kap chiam a, Falam khawpui atangin 122 Laipuiin an bomb reng bawk” tiin CDF sipai pakhat chuan a sawi bawk.
Tlangzar khua hi Falam khawpui atangin mel 17 vela hla a ni a, In 30-50 vel awmna khua nia hriat a ni bawk.
Military council sipai ten Ramthlo leh Tlangzar khaw inkarah buk an khuar avangin tualchhung mipui te veivak lo turin an hriattir a ni.
