Sagaing region, Watlet township-ah February 28 atangin March 5 thleng khan Military council sipai chenna in 600 chuang an halchhia a, tualchhung mipui 8 an kap hlum a. Khawchhung mipuite tanpui an ngaih hle thu Watlet township-a raltlan tanpuitu pawl te hnen atanga hriat a ni.
Watlet township-ah Military council sipai ten a luhchilh avangin khaw 9-ah chenna in 600 chuang an halchhia a. Heng bakah hian Gyi Kan khuaah PDF 2 leh tualchhung mi 4, Moh Soe Chain khuaah leilet mi 1 an sawisa hlum a, Bote khuaah kum upa 1 an man hnuah an thah thu hriat a ni.
Military council sipai ten Watlet khawpuiah kawng hrang hranga an luhchilh thin avangin chenna in an hal nual bakah tualchhung mipui tlanchhia an pung chho zel avangin tanpui an ngaih hla thu Watlet township-a tlawmngai pawl Ko Lun Moe Tant chuan Yangon Khit Thit Media a hrilh a ni.
“Tlawmngai pawl ten kan theih ang angin sum kan zawng thin a. Chenna in nei lo te leh raltlante tan ei in leh damdawi kan sem thin a. In kang tuar te an tam deuh avangin tanpuina sumin a daih thin lo, thawhho a tul khawp mai” tiin Ko Lun Moe Tant chuan a sawi a ni.
Chenna in 65 kanna TeTaw khaw mipuite chhungkaw khatah buhfai no 24-in kan tanpui a. Chhungkaw dang te pawh tanpui kan tum mek a, chenna tur te, ei in leh damdawi an la mamawh hle a, kan tanho a ngai khawp mai tiin Watlet township-a tlawmngai pawl lian ten an thuchhuahah an tarlang a ni.
