Chin State, Falam township, Webula khua Military council sipai ten April 10, zing dar 11:00 vel khan Jet Fighter-a an bomb-naah tualchhung mipui 9 an boral bakah hliam an awm nual thu hriat a ni.
April 10, tuk khan Falam khaw kiang Var khuaa Military council sipai camp, CNDF ten an laksak hnuah Military council sipai ten chung lam Jet Fighter-in an bomb chiam a, Webula khua pawh an bomb tel thu tualchhung mi te hnen atanga hriat a ni.
Military council sipai ten an bomb-naah Webula khua School leh Field bulah bomb 2 a tla a, tualchhung mipui 9 an boral bakah hliam an awm nual bawk a ni.
“Mi 9 an boral chiang a, hliam erawh an tam khawp mai. Nu pakhat hliam an bawihsawm laiin a boral nghal a, boral zat chiah hriat a har khawp mai. A chhan chu Webula khaw chhehvelah internet a that loh vang a ni” tiin Falam khua tualchhung mi pakhat chuan a sawi.
Heng bakah hian Military council sipai ten Webula khua an bomb avangin chenna in 5 a kang chhe bawk a. Webula khua hi Var khua atangin mel 15 vel hlaa awm a ni a, Kalaymyo, Natchaung leh Falam kalna Motor kawnga awm khua a ni bawk.
April 10 tuk pawh khan Military council sipai ten Jet Fighter-in Falam township, Var khua leh Cong He khuaah vawi 6 aia tlem lo an bomb thu hriat a ni bawk a, CNO ten an thuchhuah dan chuan Var camp an beihnaah Military council sipai 14 an thi a, mi 11 an man a, ralthuam tam tak an laksak nual thu an tarlang bawk a ni.
