Military council sipaiten Jet Fighter-a Chin State March thla leh April thla chhunga an beihnaah bomb 120 chuang an thlak tawh a, CNA sipai 2 an boral a, tualchhung mipui 24 an boral tawh thu CNF-ten May 8 khan an thuchhuahah an tar lang a.
“Military council sipaiten thla 2 chhungin Thantlang, Halkha, Falam, Mindat township-ah Jet Fighter-in vawi 121 chuang bomb an thlak tawh a.
CNF thupuangtu Salai Thet Ni chuan ‘Chung lam atanga an beihna chhan hi khawmual lama an beidawn vanga an beidawn thil tih a ni’” tiin a sawi a.
Hetia Military council sipaiten bomb an thlak avangin khaw 4-ah bomb 22 a tla a, a khaw chhehvelah bomb 99 a tlak thu CNF ten an sawi a ni.
March 30 khan Thantlang township-a Khuaphu khuaah te, April 10-ah Falam township Webula (Wai Bu Lah) khuaah te, April 16 khan Mindat township circuit No.1, Panpa khuaah te leh April 27 khan Thantlang township Thlanrawn khuaah te bomb an thlak nual thu hriat a ni a.
Military council sipaiten thla 2 chhung bomb an thlaknaah CNA sipai 2 leh Chin tualchhung mipui 24 an boral a, mi 33 an hliam thu CNF ten an thuchhuahah an tar lang a.
Military council sipaiten bomb an thlakna avangin Biak in 4 telin In dang leh chenna in 50 chuang an chhiat thu hriat a ni bawk.
