Chin State, Halkha leh Thantlang khaw inkar Timit phaitualah Military council sipaite leh CNF/CNA tangrualte nen chawlhkar 2 chhung an inbei tawh a. Timit phaituala inbeihnaah hian Military council sipaite an thih nual angin CNF/CNA sipaite pawh an boral nual thu hriat a ni a. Hemi chungchangah Khonumthung Media-in CNF/CNA thupuangtu Salai Thet Ni, an interview-na i lo tar lang ang.
Zawhna: Halkha leh Thantlang inkar, Timit phaituala inbeihna chungchangah tawi fel deuhin min hrilh thei ang em?
Chhanna: May 26-a an rawn chhoh hma ni 3 atang khan Thlawhna leh ralthuam lian kap chhuakin kawng an sial tan a, May 26-a an rawn chhoh atanga khan vawiin thlengin kan la inbei chhunzawm zel a. Keini lamah sipai 12 an boral a, sipai 10 vel an hliam a. Anni lamah sipai 30 vel an thi thung tih a ni a, kan chhut dan chuan sipai 27 an ni a, sipai 15 vel an hliam niin tualchhung mite hnen atanga hriat a ni. Tun tum inbeihna hi chu an la chhunzawm hmel khawp mai. A chhan chu Military council sipaite hian Thantlang camp luah an tum ran a, chu hmun atang chuan min rawn beih an tum ni angin a lang a.
Zawhna: Timit phaituala inbeihnaah CNF/CNA sipai 12 lai an boralna chhan hi eng vang nge ni ang?
Chhanna: An boralna chhan tam zawk chu ralthuam liana an bomb vang a ni tlangpui a. May 29 khan kan lam sipai pakhat hliam chu an thianten an va bawihsawm tumna lamah bomb puakin kan sipai 6 an boral nghal a, mi dang hliam te pawh in enkawlna hmun an thlen hmain an boral zui nghal bawk a, an boralna chhan chu bomb puak fuh vang a ni ber mai.
Zawhna: Military council sipaite hi eng ang ruahmannain nge Thantlang lam an chhoh kher le?
Chhanna: Anni hian kan Chin State hi Martial Law hmunah an puang tawh a, chu bakah Chin State, Kayinni leh Sagaing region hi chung lam leh hnuai lam atangin min tin zawn bik a ang a. Hetiang vek hian kan CNF/CNA ralrelna hmunpui Victoria camp pawh min beih nasat hle an tum a ni.
