Sagaing region, Kalaymyo khawpui atangin Chin State Tedim khawpui leh Rihkhawdar khawpui pana tlan thin khualzin phur Lirtheite Chin State leh Sagaing ramri Ku Maing (Mel 9) check gate-ah Military council sipaiten kal tlang an phal loh thu Driver te leh passenger te hnen atanga hriat a ni.
Kalaymyo atanga Tedim – Rihkhawdar Indo-Myanmar ramri No.2 (Tiau – Khawmawi) pan tur chuan Kalay-Khaikam-Taingen motor kawng hman a ni thin a. Military council sipaiten Chin State leh Sagaing ramri Ku Maing check gate-ah Lirthei eng chi pawh tlan tlang an phal loh avangin kawng dang atangin an kal thin thu Kalaymyo atanga Rihkhawdar motor service thin gate counter pakhat chuan hetiang hian a sawi.
“Military council sipaiten Ku Maing check gate an khar thin a, tlai lamah an hawng leh zawk thin, an khar avangin kawng dang atangin kan hel thin” tiin a sawi a.
Ku Maing check gate an khar thin avangin motor chuan man a letin a sang chhova. Tun hmaa Kalaymyo atanga Rihkhawdar (Tiau) thleng mi pakhat motor chuan man Kyats 30000 a nih laiin tunah chuan Kyats 80000-100000 a nih thu hriat a ni.
Hetia Motor chuan man a san chhan hi Ku Maing check gate-ah Military council sipaiten motor pakhatah Kyats Nuai khat an khawn thin bakah Taingen khuaah pawh Kyats Nuai khat thleng an khawn thin vang nia hriat a ni bawk.
Kalaymyo leh Tedim khaw inkarah April 18-25 thleng khan Military council sipaite leh CDF te an inbeih thin avangin motor kawng khar thin a ni a. April 26 atang khan CDM Siyin ten kawng hawn leh a nih hnuah Military council sipaiten Kalaymyo chhuah, Ku Maing check gate-ah Lirthei kal reng reng an dang leh vek a ni.
Kalaymyo atanga Tedim pan tur Lirthei te chawhnu dar 4:00 hnuah kal tlang an phal chauh a, zanah Tedim thlen a ngaih thu tualchhung mi pakhat hnen atanga hriat a ni a.
“Eng vang nge tih kan hre lo. Zanah chauh chhuah an phal a, zanah Tedim khua thlen a tul a, zan curfew a ni bawk sia, a khaw thlen hma kawng zatve velah riah a nih hnuin a tukah kan chhuak leh thei chauh” tiin a sawi a.
Tun dinhmunah hian Kalaymyo atanga Tedim khua thleng, mi pakhat motor chuan man Kyats 25000 a nih thu hriat a ni bawk.
