Myamar ramah dik lo taka thuneihna pawng lak a nih atanga kum khat chhungin military council sipaiho kah hlum vanga pawisawi lo civil mi thite chu mi 1993 awmin, man tawk 14185 an awm thu Assistance Association for Political Prisoners (AAPP) pawl chuan thuchhuah an siam a ni.
He chhinchhiahna hi nikum 2021 February ni 1 atanga kumin June ni 20 thlenga AAPP record lakkhawm a ni a, a takah chuan chu ai pawha thi an tam zawk a rinawm thu tarlan tel a ni a.
Spring Revolution chhungin vawiin thlenga man tawk zat chu mi 101124 niin, chung zinga mi 1164 chu jail tantir an ni tawh a. Jail tang zingah kum 18 hnuai lam 2 telin mi 73 chu thi tura an chung thu rel a ni.
Arrest warrant chhuah avanga biru mi 1979 awmin, tih hlum tawk 41 telin mi 120 chu tihhlum tawh anga an chungthu rel tawh a nih laiin, tih hlum tura tih chu mi 115 thleng an awm tawh a ni a. Tun hnaiah intiamkamna emaw Bel-a chhuah mi 21 awmin, chutianga chhuak zawng zawng chu 3040 an ni.
Chu bakah thuneihna lak a nih atanga kumin 2022 May thla tawp thlenga military council sipaiten dik lo taka in an kalhsak tawh zat chu 617 chuang a nih thu thu AAPP chuan a tarlang bawk a.
June ni 15 zan dar 10 velah Yangon kawpui chhak lama awm University of Law 2nd year zirlai Ma Shwe Yi Win leh a pate chu firfiak sipaiten Yangon region, Kyitmintaing township veng chhunga an chenna ina man an nih thu hriat a ni a.
June ni 16 zanah pawh Tanintayi region, Launglong township, GawhInn khuaah firfiak sipaite lutin tualchhung mi Ko Zaw Latt an kah hlum thu hriat a ni.
Chutianga tualchhung, khaw chhung leh hmun hrang hranga pawl hruaitu, activist te, chanchinbu mite, CDM-a tel te leh pawl hrang hranga mite man, hren leh thubuai siamsak tawkte bakah Revolution chhunga nunna chante chanchin thar hriat nei chuan AAPP a hrilh hriat zel theih a ni.
