Myanmar-a dan lova thuneihna pawng laktu Military council thlawpthu sorkar leh ram hrang hranga pawl 60 chuang list, Just For Myanamr ten an thuchhuahah an tarlang.
“Thuneihna Hmelhmang” tih thupui hmangin January 25-a an thu tarlanah chuan ram hrang hrang ten an puih mek Myanmar Military council te hi kawng hrang hranga kawmserh turin an tarlang a. UN telin ram hrang hranga pawl 60 ten Myanmar Military council te an tanpui thu kimchang talkin an thuchhuahah an tarlang a ni.
He an list tarlanah hian khawvel sorkar 22, UN-a tel pawl 14, ram insuihkhawm pawl 26, khawvel financial institution pawl 8 leh ram dang insuihkhawm pawl 8 te nen an inthlun zawm thu an tarlang a ni.
Military council te an puihnaah hian chi 4 a awm a. Pakhatnaah chuan ram danga Military council an Meeting-naah Myanmar palai thu sawi theihna leh a tul anga tanpui teihna, Pahnihnaah Military council tan technology lam an thiamna tur leh thawkho turin, Pathumnaah develop-an tur leh sum hman tur leh puk chungchanga thawhho leh Palinaah chuan Military council te kaihhnawih Hotel hna, Office leh In luah-a hnathawh te an ni.
Heng bakah hian Military council sum leh pai, an thuneihna thlengin eng tin nge kan venpui anga kan tanpui ang tih bakah dan lam thlengin thawhpui tur thu a tarlang bawk.
Just For Myanmar thupuangtu Ma Yadarna Maung chuan “Myanmar Military council ten thuneihna an pawng lak hnu kum 2 dawnah hian mipui 2800 an that tawh a, mi 13600 chuang an man tawh bawk. Mipui chenna in an hal nual a, chung lam atangin an beih bawk avangin mi maktaduai khat chuang in leh lo tlansanin harsatna an tawk mek” tih thu a sawi.
Tun dinhmunah hian Military council-te tharumthawhna avangin ram chhung mipui ten harsatna an tawk nasa hle a, ram hrang hrang atanga tanpuina an la beitham mek laiin Military council thlawptu ten an la tanpui zel kan hmuh hian hriat thiam a har hle a ni tiin a sawi zui bawk.
International level meeting-ah pawh Myanmar Military council palai te sawmin training te an pek bakah Military council te kaihhnawih Hotel tan Dollar maktaduai tam tak an tanpui thin hi chu hriat thiam har tak a ni tiin a sawi zui bawk.
