Myanmar Military council-te chetna avangin April 1 atangin 28 thleng khan hmeichhia 55 an boral tawh a, hmeichhia 43 an man tawh thu Burmese Women’s Union ten an thuchhuahah an tar lang a.
Military council sipaiten April 11 khan PaZinGyi khua Thlawhnain an bomb a, tualchhung mipui tam tak an boral zingah hmeichhia 45 an boral thu Burmese Women’s Union-ten an thuchhuahah an tar lang a.
Military council-te hian kum 2021 January 1 atanga thuneihna an lak hnu kum 2023 April 28 thleng khan hmeichhia mi 3390 an man tawh thu hriat a ni a.
Military council-ten thuneihna an lak hnu kum 2 chhung hian hmeichhia 513 an that tawh a, hmeichhia 819 thubuai an awrhtir thu Burmese Women’s Union-ten an thuchhuahah an tar lang bawk.
Heng hmeichhia an man leh an thahte zawng zawng hi Political prision (AAPP) leh Burmese Women’s Union-ten an chhinchhiah dan a ni a, chik taka chhui dawn chuan hei ai hian an tam zawk mai theih thu an sawi a.
Military council-ten an man tak hmeichhia tam zawk te hi Mandalay region, Yangon region, Mon State, Bago region, Shan State, Chin State leh Sagaing region te an nih thu hriat a ni bawk.
Heng bakah hian Military council-te beihna avangin March thla chhung khan hmeichhia 29 an that a. Sagaing region-ah hmeichhia 17 that tawhin an tam ber a. March thla chhung vek hian hmeichhia 58 an man a, heng an man zingah Sagaing region-ah mi 19 niin an tam ber thu Burmese Women’s Union-ten May thla chhung khan an thuchhuahah an tar lang a ni.
Military council-ten thuneihna an lak hnu atang hian dan lovin hmeichhia an that nual tawh a. Naupang 592 an man tawh zingah mi 363 an thah tawh thu Political prison (AAPP) ten an thuchhuahah an tar lang bawk a ni.
