Military council ten thuneihna an lak kum 2 hnuah hmeichhia mi 2778 an man thu Myanmar Women’s Association chuan an thuchhuahah an tarlang.
He an thuchhuah hi February 6 khan an tichhuak a, kum 2021 February 1 atangin kum 2023 February 1 thlenga Military council ten an hmeichhe man te an ni a.
Heng an hmeichhe man te hi Yangon region-ah mi 758 niin an tam ber a, Kayin ni state-ah mi mi 9 aia tlem lo manin a dawttu a ni a. Hetiang vek hian Sagaing region leh Mandalay region-ah hmeichhe 300 ve ve leh Pegu (Pa Gu) region leh Thanintari (Ta Nin Ta Ri) region-ah hmeiche 200 ve ve an man tawh niin an sawi.
“An man tawh zingah Daw Aung San Suu Kyi (Awng San Suh Chi) hi a filawr ber a. Military council te dodal vanga an man ni lo te pawh mipui te an man a, an pawngsual bawk a, nunrawng tak an ni a, khawvelin a hriat a mamawh tiin an thuchhuahah an tarlang. Thuneihna 6 an pawh sei leh pawh hian an la man zel ang a, khawchhungah vak kualin an man leh ngei ang” tiin CDM-a lut Education office hmeichhe pakhat chuan a sawi.
Military council ten thuneihna an lak kum 2 chhung hian hmeichhia mi 2000 chuang an man zingah Education Dept. atangin mi 365, Health Dept. atangin mi 51, active member atangin mi 92, Media leh Artist atangin mi 10 chuang an man thu an thuchhuah an tarlang bawk.
Heng bakah hian Myanmar Women’s Association ten an chhinchhian dan chuan firfiakte chetna avangin hmeichhia 414 an boral tawh a, rualthuam leh bomb puak avangin hmeichhia mi 107 an boral tawh a ni.
Military council ten khawchhung luh chilha an kah avangin hmeichhia mi 78, chung lam beihna avangin mi 26, man tawk mek mi 53, hal hlum leh lu-a kah hliama boral telin mi 20 leh hmeichhe pawngsual zat mi 13 vel an awm, an rin thu an tarlang bawk a ni.
Hriat chian chinah hian Military council ten a huhova an pawngsual case 15, mimal atangin pawngsual case 10, operation-na leh check gate hmuna pawngsual case 5 chin hriat a ni a, chik zawka chhui phei chuan hei ai hian a tam mai thei a ni tiin an tarlang a ni.
