Chin State chhim lam, Mindat township-ah Military council sipai ten Jet fighter 2-in March 13 zan khan an bomb thu CDF te hnen atanga hriat a ni.
Mindat khawpui atanga mel 15 vela hla, Mindat leh Matupi khawpuiah March 13 zan dar 10:00 vel khan Military council sipai ten Jet Fighter 2-in bomb an thlak a, chhiatna an awm nual thu CDF-Mindat thuneitu pakhat chuan a sawi a ni.
“March 13 zan khan Thlawhna 2 zingah pakhatin min bomb thu Mindat leh Matupi kawnga mi ten kan hria a. Zan khuain ralthuam lian hmangin vawi 20 chuang min bei a, thi leh hliam kan hre thei rih lo, March 14 tukah pawh vawi 4 lai an bei nawn leh” tiin a sawi zui bawk.
Military council sipai ten an bomb lai hian Mindat khawpuia innghat Military council Kah Lah Yah (LIB) 274 Battalion ten March 14 tuk khan ralthuam lianin an beih thu hriat a ni.
Military council sipai 80 rual ten March 13 khan Pakkoku khua atangin Kyaukhtu (Chauh Thuh) khua an luh atangin an bei tan a. Heng Military council sipai te hian Chin State Mindat leh Matupi khua an pan dawn nia rin a ni a, Military council sipai ten an hlauhthawn avangin ralthuam an chelek thu rin a ni.
Military council sipai te hian Mindat leh Matupi khua an pan rin avangin Kyauhthu khua, Mindat leh Matupi khaw kawngah mipuite veivak lo turin PDF-Mindat ten March 13 khan mipui te hnenah an hriattir a ni.
Chin State chhim lam Mindat, Matupi leh Kanpalet khawpuiah Military council sipai ten internet leh phone an khar avangin chanchin hriat a harsa hle a ni.