Mindat khuaa inkhuar IB 274 battalion atangin June ni 16, zing lam dar 9 velah Mindat township, circuit 3 khaw lam chu 120mm laipui hmangin an kap a.
IB 274 battalion nena inepa awm circuit 3-a Hmuitui khaw bulah laipui mu tlain a puak a, lo lama hnathawk hmeichhia 2 leh mipa pakhatin an thih pui thu CDF-Mindat thupuangtu Salai Ha-Awmin heti hian a sawi.
“Circuit 3-na Hmuitui khua chu Mindat khaw chhunga inkulh IB 274 battalion nena inep chiaha awm a tih theih a. Chu khua chu laipuiin vawi 3 an kap a, kum 70 mi mipa, kum 60 mi hmeichhia leh kum 30 mi hmeichhe dang chu laipui mu puakin a deng hlum a ni.”
Laipuia kah hlum kum 70 mi mipa leh hmeichhe pahnihte chu lo lama an hna thawh lai niin, laipui mu puakin deng fuhin an thihpui a.
Chu bakah chenna in 4 pawh laipui muin a den chhiat rualin mi pakhat pakhat pawh a hliam tel bawk thu hriat a ni.
Mindat khaw chhunga awm IB 274 battalion chuan inkahna chhuak lo mah se, ni tin deuh thaw, thing tlang khaw lam hawi leh awmze nei takin laipui an kah puah thin thu Salai Haa-Awm chuan heti hian a sawi leh a.
“Kan Mindat khuaah CDF te an awm tih an hriat vang pawh a ni lo, chet lakna kan neih vang pawh a ni lo, tum nei takin kan chi puite awmna khua chu an kap a, chu chu indona a ni lo, kan chi puite, hnam puma mi nuaichimih an tum niin a sawi thei a. A hman hun apiangin an kap puak a, zanah pawh an kap a, chhunah pawh an kap ziah bawk a, mipui awmna hmun chu tum nei ranin an bei a ni.”
Mindat khuaah June ni 14 zing lamah military council sipaite leh CDF-Mindat te inkarah inkahna a chhuak a. Mindat khaw luhna gate-a awm sipaite chu CDF-Mindat lamin an kap a, anmahni tanpui tura lo thawk chhuak military council sipaite pawh Mindat khaw chhung immigration office bulah lam bunin an lo kap bawk a, chu mi ni chuan sipai 5 vel an kah hlum thu Mindat township awptu pawlin thuchhuah an siam a.
Chu inkahnaa a tuar zawka tang military council sipai IB 274 leh Chauhthuh atangin laipui vawi 9 ngawt an kap puak a, khaw thenkhatah chhiatna a thlen thu hriat a ni.
