April 6 khan Yangon region. Mingaladon township khawpuia Urban Guerrilla pawl ten Military council Airforce hmunpui Mingaladon Airbase chu heavy-armed shock missiles-in an beih thu tualchhung mi te hnen atanga hriat a ni,
April 6, zan 9:10 vel atang khan minute rei lo te an bei zawn nasa hle a, bomb ri leh silai ri thawm a nat hle tualchhung mi pakhat chuan a sawi a.
“Airport luhna main gate-pui pawh shock missile-in an kap alh a, kan chenna in pawh a nghawr nasa hle a, a chhe nual bawk. Airfore hmunpuia thil thleng hian thil tam tak a tichhia a, Thlawhna tlanna Runway pawh a kang chhe nual a, Fire Tender kangthlelh motor tam takin an thleh a. Airbase compound chhungah damlo phur ambulance motor te an vei kual hle a, he thu hi zep tlat an tum avangin chanchin thar lakhawmtute pawh Airbase chhungah luh an phal lo a. Airbase chhunga hnathawkte leh an chhungte pawh pawn chhuah an khap tlat a ni”
Military council troops ten Yangon khawpui atang leh khaw dai Hmawbi khua lam atangin Airbase chu ralthuam famkim nen an rawn thleng khawm vat a, Thlawhna tui dah khawmna (Jet fuel storage tank) thenkhat a kangchhe nual a. Compound-a chhungkhaw awm te hlauthawng hle mah se, thuneitute an khap tlat a ni.
Tun dihmunah hian Military council ten an inkulhna chhungah damlo zual phurhna motor Ambulance luh an phal lova, Battalion Clinic-a damlo te pawh enkawl an phal loh thu tualchhung mi ten an sawi a ni.
Military council sipai ten leilung fate awmna telin Myanmar laili hmun hrang hrangah chung lam Thlawhna hmanga an bomb nasat avanga he Air Force base hi beih an nih thu an sawi a. He beihna chungchangah Military council sipai ten eng thu mah thu an la chhuah rih lo a ni.
Hetiang vek hian November 21, 2021 pawh khan Mingaladon Air Force Base hung chhung beihna a lo tawk tawh a, hnathawktu mi 7 an thi a, mi 7 an hliam thu hriat a ni bawk.
