MOCHA thlipui avangin Rakhine State leh Chin State-ah chhiatna tam tak a thlen avangin mipuite leh a tul anga thawm that bakah tlawmngai pawlte hman atan tiin USAID chuan US Dollar nuai 2 (Myanmar Kyats nuai sang li)-in an tanpui dawn thu May 17 khan US Ambassy atangin thuchhuah an siam thu hriat a ni.
Rakhine State, Sittwe township-ah MOCHA thlipui avangin a khawchhung 90% a chhiat bakah Rohingya raltlan camp-a Rohingya mi 100 chuang an thih thu hriat a ni a.
MOCHA thlipuiina a nuai chhiat zual bikna Rakhine State hi ram hrang hrang te tanpuina tel lo chuan ngai a awh theih an rin tawh loh thu tlawmngai pawl zinga Driector U Zaw Zaw Tun chuan RFA Media a hrilh a.
NUG sorkar Acting President Duwa Lashi La chuan “Rohingya camp-a mite rin loh taka hetia an thih nual avang hian a lungchhiatthlak khawp mai. Rakhine State 60% chuang chhiat tawhna chungchangah thawm that leh puih an pawimawh hle” tiin May 17 khan a sawi a, NUG hian MOCHA thlipuiin a nuai chhiatte tanpui nan US Dollar maktaduai khat an tanpui dawn thu a sawi zui bawk a ni.
NUG sorkar Ministry of Humanitarian Affairs and Disaster Management chuan MOCHA thlipui avangin Rakhine, Chin, Magwe, Sagaing, Yangon, Bangladesh; Cox's Bazaar hmuna mite tan Myanmar Kyats maktaduai 59, an ruahman thu May 16 khan an thuchhuahah an tar lang a ni.
Heng bakah hian NUG Health Ministry-ten Sagaing, Magwe leh Chin State-ah inenkawl lawkna atan Kyats maktaduai 28 a tanpui dawn thu a sawi bawk a.
US Ambassy-ten an rel angin MOCHA thlipui a tleh hma hian US sorkar leh insuih khawm pawlten inven lawkna tur ei in leh hmanraw pawimawh thahnem tawk tak bakah damdawi leh awm lailawkna tur te an ruahman lawksak thu hriat a ni a.
MOCHA thlipuiina a nuai chhiatna hmun zualpui deuhah chhawmdawlna leh a tul anga hmalak a nih hmasak dawn thu US Ambassy chuan an thuchhuahah an tar lang bawk.
