Mandalay region, Mogok (Mu Koh) khawpuiah Military council sipaite leh PDF te inbeihnaah Military council sipaite 30 vel an thih thu NUG Battalion 1222-a information thuneitu pakhat chuan a sawi.
January 20, chawhnu 12:30 khan Mogok township Mang Hong (Maing Hawng) khaw kianga NUG Battalion 1222 awmna camp, Military council sipai ten chung lam leh khawmual lam atangin sipai 200 rual operation pawl 4 ten minute 30 vel an bei a. He inbeih tawnnaah hian Military council sipai 30 vel an thih thu hriat a ni.
Military council sipai ten Jet Fighter 3 hmangin bomb vawi 30 zet an thlak a, khawl hmangin bomb 10 aia tlem lo an kap chhuak bawk. Military council sipai ten khawmual atang pawhin 40 MM, 60 MM, M9 leh SLR Fifle-in an kah nasat thu hriat a ni.
He inbeihnaah hian chung lam atanga bomb thlakna avangin Battalion 1222-a platoon leader pakhat bomb si perin a fuh a, sipai 3 an hliam a, sipai dang te a insaseng nual thu hriat a ni.
Camp luahtu ten an chhuahsan a, camp chhunga Generator engine, Dynamo, Bike 5, ration tam tak leh sipai bag leh bungraw dang tam tak an hloh nasat thu hriat a ni bawk.
