Magwe (Ma Gui) region, Myaing (Miang) township, Magyikone khuaah April 18 khan Military council sipaiten an luhchilh hnuah damdawi ina inenkawl mek thalai mi 10 aia tlem lo an thah bakah tualchhung mi 30 chuang Chema vauin an man thu tualchhung mipuite hnen atanga hriat a ni.
April 18 zing dar 11:00 hnu vel khan Military council sipai ten Myaing township, Magyikone khuaah Mi 35 Helicopter pakhatin an bomb a, Mi 17 Helicopet 2-in sipai an dah nual hnuah khawchhung an bei a. Damdawi ina damlo inenkawl mek leh kum upate Chemin an vau a, damlo enkawl mek thalai rual mi 10 aia tlem lo an kah thum thu PDF hnen atanga hriat a ni.
“Magyikone damdawi in Military council sipai ten a luhchilh hian kut bung leh ke bung tlan ve thei lo thalai rual an kap hlum a, mi 10 vel an ni ang. Military council sipai ten Thlawhnain Myaing leh Magyikone damdawi in an bomb a, a hnuah Thlawhna atangin sipai an rawn dah theuh hnuah an bei chhunzawm leh a. Damdawi ina awm an tlanchhe nual a, tlanchhe ve thei lote an kap hlum nual, tunah Military council sipaite an la awm mek” tiin PDF hnen atanga hriat a ni.
Hemi hnu hian Military council sipai ten Magyikone damdawi in leh a khawchhunga tualchhung mi 30 chuang an man a, thu an zawhnaah an sawisak nasat hle thu tualchhung miten an sawi a ni.
“Mi 30 an man te hi hmun pakhatah an dah kawm a, an sawisak nasat hle thu kan hria a. Pawn an chhuak thei lova, an dinhmun a derthawng khawp hle a, rilru a nuam lo khawp mai” tiin PDF-ten an sawi a ni.
Military council sipai ten an thuchhuah danah chuan hmeichhia 10, mipa 20 te hi PDF-ah an inhnamhnawih avangin man an ni tiin an tarlang bawk.