India, Manipur State Chiande district-a Myanmar raltlan ten kar khat chhungin Myanmar-ah kan thawn kir dawn tiin February 22 khan thuneitute leh police te bakah Assam rifle ten an thuchhuahah an tarlan thu hriat a ni.
Tamu khuaa Manipur State-a raltlan pakhat chuan “Keini pawh an thupek chhuah angin Card an check a. card kan thukru a, thenkhat chu thlaphang chungin an kir hlawm a. Raltlan awmna in pawh zanah an luhchilh a, an thiat bawk a, chawlhkar khat chhungin mahni rama kir turin thupek an chhuah a ni” tiin a sawi a ni.
Raltlante hi Chin mi deuh vek an ni a, Military council te an chetna avanga raltlante an ni hlawm a.
A hlimchhawnah chuan India, Manipur State sorkar ten illegal migrants verification an siamsak hnuah tualchhung thuneitu ten heti hian hma an la ta a ni.
Hetianga hnawhchhuah runpui an beihna avangin raltlan zingah hmeichhe tleirawl pakhat a rilru a chian loh phah a ni.
Tamu khuaa Manipur State-a raltlan pakhat chuan “Moreh khua leh a chhehvela awm te pawhin Moreh khuaah an rawn lut dawn tih kan hriat avangin ramhnuaiah kan tlanchhia a, a herhawm khawp mai. A bik takin kum upa leh naupang ten harsatna an tawk zual a, raltlan tan card min siamsak mah se, eng tihna mah a ni lo” tiin a sawi a ni
