Tum hmasa khan Myanmar inthlanpui chungchangah CNF thupuangtu Salai Thet Ni, CNDF Chief commander Peter Thang leh PDF-Zoland thupuangtute interview kan ngaithla tawh a. Tun tumah erawh chuang CJDC Joint secretary 2, Salai Paula, CDF-Matupi thupuangtu Salai Aron leh CHRO hruaitu Salai Za Uk Ling te biangbiakna kan nei leh dawn a ni.
CJDC Joint secretary 2, Salai Paula
Myanmar inthlanpui tur chungchangah zawhna chhangin CJDC Joint secretary 2, Salai Paula chuan heti hian a sawi“Thuneihna pawng laktu Min Aung Hlaing kaihhruai ten 2008 ram dan leh hrai an duan an pal zut a, chumi dan leh hrai hmang chuan inthlanpui an buatsaih dawn a. Party te hneh angin bumna hmanga thuneihna an channa tur hi keini chuan kan duh lova. An thuneihna hmangin ram an hruai leh dawn tih kan hmu lawk a, heng thil hi zalenna famkim inthlanna a nih loh avangin kan do a ni. Mipui duhthlanna inthlan a nih loh avangin kan pai dam thei lo a ni”.
CDF-Matupi thupuangtu Salai Aron
Chtiang vekin CDF-Matupi thupuangtu Salai Aron chuan Myanmar inthlanpui chungchangah a ngaih dan hetiang hian a sawi ve leh a.“Military council ten kumin 2023 inthlanpui an buatsaihna turah hian keini Matupi CDF ten kan rem ti lo a ni. Chin State, township 9-a khaw hrang hrang te CDF ten kan thunun vek thei lo nain khaw tam zawk chu kan thunun thei a. Khawpui thenkhat erawh an thunun mek a, keini Matupi khua erawh chu Military council te thununna hmun a nih avangin inthlan buatsaih thei turah kan ngai a. Nimahse keini lam chuan theih tawpin kan dang ve thung dawn a ni.
CHRO hruaitu Salai Za Uk Ling
CHRO hruaitu Salai Za Uk Ling pawhin inthlanpui turah a ngaih dan a sawi chhunzawm leh a. “Inthlanpui buatsaih turah hian pakhatnaah Military council ten inrin tawkna (Credibility) an nei lo. Eng vang nge tih chuan kum 2020 inthlanpuiah khan vote an tichingpen a, Democracy dan lo angin thuneihna an la a. Hemi hnu hian inthlan an buatsaih leh a, mipuite tihluihnain an kal zel avangin inrin tawkna an nei lo a ni. An chet dan hi Democracy nihna a phawk zo lo a ni.
Pahnihnaah chuan ramchhungah tharum an thawh nasa hle a. Chin State-ah kan en chuan khawpui tih lohah chuan thununna hmun an nei lova, ralthuam hman tur an neih khawp loh bakah vote thlak theih tur thalai rual an bei bawk a. Heng avang hian inthlanpui buatsaih dawn mah se, vote thlak tur an awm lo ang.
Mipuite pawhin vote thlak duhna rilru an nei dawn lo tih a chiang a. Chuvangin vote thlak duhtu an awm si lovah chuan vaukhanna leh tihluihnain an thlaktir mai thei a. Hetiang dinhmun a nih chuan Democracy kalphung a hlawhtlin a rinawm loh tih hi ka rin dan a ni” a ti a.
