Arakan Rohingya Salvation Army (ARSA) leh Rohingya Solidarity Organization (RSO) ralthuam keng pawl te an inkahna avangin Myanmar leh Bangladesh ramria Rohingya raltlan camp pakhat January 18 chawhnu khan an hal chhiat thu Rohingya mi ten an sawi.
“Bangladesh lam atang chuan raltlan camp a hla hle a, Myanmar lam atang chuan a hnai khawp mai. ARSA leh RSO an inkap tih thu kan hria a; raltlan camp an hal thu an sawi bawk a, tute nge awm tih kan hre lo” tiin Bangladesh-a awm Rohingya thalai insuihkhawm dintu Ko Khin Maung chuan a sawi.
Raltlan camp an halnaah hian Rohingya mi 3000 chuang an awm a,an hal hnu hian tumah an awm tawh lova, Myanmar lamah leh Bangladesh lamah an tlan chhiat nual thu a sawi zui bawk.
Ramri camp haltute hi tute pawl nge an nih RFA Media ten an hre chiang lo.
ARSA pawl te hi Bangladesh-a awm Rohingya hruaitute vautu an nih angin NLD sorkar lai pawh khan terrorist pawla an puan te an ni.
Rakhine State-ah kum 2016-2017 khan ARSA pawl te an rawn chhuak a, heng pawl te tanchhanin Military council ten then fai hna an thawhnaah Muslim mi maktaduai 7 vel, ral leh lam Bangladesh lamah an tlan chhiat thu hriat a ni.
