Sagaing region, Myaung township-ah March 12-19 chhung khan Military council sipai ten an beihnaah tualchhung mi singhnih (20000) chuang, in leh lo an tlansan tawh thu tualchhung mi ten an sawi a ni.
March 12 khan Minmu township atangin Myang township-ah Military council sipai 170 rual ten an luhchilh thu Myaung township PDF te leh security pawl CDSOM thuneitu Ko Nwe Oo( Nuai U) ten an sawi a.
“Kar khat vel a ni tawh, Blue commando pawl te leh Kyauk Yit pawl te avangin an tlanchhe nual a. Yesagyo (Yi Sa Chu) atangin Myaung khuaa ration phur pawl te nen pawl 3 an ni” tiin a sawi zui bawk.
Military council sipai ten Minmu township atangin Myaung township-ah luhchilhin tualchhung mi 3 an thah thu Ko New Oo chuan a sawi bawk a ni.
Military council sipai ten an beihna avangin khaw 15-a tualchhung mi te an tlanchhiat nual thu hriat a ni a.
He beihna boruakah hian Sagaing region Military council thupuangu U Aye Hlaing chuan khual a zin avangin eng thu mah a hriat loh thu a sawi a ni.
UN mipui tanpuitu pawl UN OCHA ten an chhinchhiah dan chuan Military council sipai ten thuneihna an lak hnu hian Sagaing region huam chhungah in leh lo tlansan mi nuai 7 leh a chanve chuang an awm tawh thu an tarlang a ni.