Naypyitaw (Ni Pi Taw) khawpuiah Army Day vawi 78-na an hmannaah thil chi hrang hrang pho chhuah leh zawrh a ni a, office-a hnathawk reng reng kal loh awih loh tiin Military council ten an kal luihtir thu office hnathawkte hnen atanga hriat a ni.
Military council hnuaia Cooperative Minister leh Department of Small Scale Industries ten March 17-19 (9:00 AM – 5:30 PM) thleng Army day an buatsaihnaah thil chi hrang hrang pho chhuah leh zawrh chhuah a ni a. Office hnathawkte loh theih lova kal ngei ngei turin Military council ten a nawr luih thu hriat a ni.
“He Army Day-ah hian mipui an kal mumal lova, office hnathawkte an kal tur a ni tiin thupek an chhuah avangin an kal lui hram a. Tumahin an ngaihsak lo. Hetiang hian Naypyitaw leh State, region level-ah pawh Kut leh function eng emaw a awm pawhin office hnathawkte an tin zawn ber a. Tuitheh Kutah pawh an tur lui leh tho ang. Kum dangah pawh thupek chhuahin an kal luihtir thin” tiin Naypyitaw khawpuia mi ten an sawi a ni.
Military council ten tunneihna an lak hnu atangin ram chhung dinhmun a zalen a ni tih lantir an duh avangin Naypyitaw khawpui leh State, region hmun hrang hrangah thil zawrh Kut chi hrang hrang an buatsaih thin a, mipui ten an ngaihsak lo vangin an hlawhtling vak lo a ni.
