Chin State-ah CNA khaihhruai CDF te leh Military council sipai te ni 10 chhung inkahnaah Military council sipai 45 an thi a, CDF sipai 3 an boral thu hriat a ni.
CNA kaihhruai CDF tangrual pawl leh Military council sipai te February 1-11 thleng Chin State Matupi township Zotung huam chhung leh Thlantlang township-ah an inkah thu CNF ten February 12 khan an thuchhuahah an tarlang.
CNA Brigade 1, huam chhung Matupi khua leh Rizua khaw inkar Zotung huam chhungah February 4 atang khan Military council sipai 130-150 rual ten operation an neihnaah CNA tangrual pawl CDF-Matupi, CDF-Zotung, CDF-Mara ten ni 6 chhung an kah rawnnaah Military council sipai 40 aia tlem lo an thi a, mi 20 chuang an hliam thu CNF ten an thuchhuahah an tarlang a ni.
CNA Bridage 3 huam chhung Thlantlang khuaah CNA legh CDF-Thantlang ten February 1 khan Military council sipai telin police 6 te an ralthuam nen an man a. February 8 pawh khan Military council camp leh an office an laksak thu an tarlang bawk a ni.
February 4 pawh khan CNA Bridage 4 huam chhung Laitui khaw bula ei in phur mek CNA leh CDF-Hualngoram sipaite Military council sipai thlawptu ZRA ten an inkap a, ZRA sipai pakhat a thi a, mi 2 an hliam thu CNF ten an sawi a ni.
February 1-12 thleng khan Military council sipai ten Jet Fighter-in vawi 10 aia tlem lo an bei a. Tun thlengin Halkha tlang chung atangin Thlantlang khaw lamah ralthuam lian an kah chhunzawm zel thu hriat a ni.
Chin State huam chhung ni 10 chhung inkahnaah Military council sipai 45 aia tlem lo an thi tawh a, heng bakah silai 50 chuang leh ralthuam tam tak an laksak tawh niin an sawi.
He inkahnaah hian CNA sipai 3 ram tan an nunna an hlan a, mi 2 an hliam thu CNF ten an thuchhuahah an tarlang a ni.
