Military council sipai pawl chuan May ni 14 zing lam dar 10- vel atangin PDF-Kalay battalion 4 camp chu jet fighter 3 hmanga bomb an thlak a, chu mi hnu darkar chanve valah MI 35 helicopter 2 hmanga an kah leh bawk thu Ko Victor-a chuan heti hian a sawi.
“Military council lamin van lam atangin an kap a. Tun hma chuan MI 35 helicopter chiah an hmang thin a. Nat-Chaung, Shiaaa-Phu inkahnaah pawh indona helicopter hman a ni a, tunah chuan a hmasa ber atan Jet Fighter an hmang ta a ni. Kan battalion 4 camp awmna hmun chu Jet fighter-a beih a ni a. Bomb an thlak a ni ber a. Chu camp-a awm kan sipaite chu emergency-a chhuahtir an ngai ta a ni.”
Van boruak lam atanga bomb an thlak hrep hnuah Kalaymyo khaw chhunga IB 89, IB 265-a force 200 velin PDF-Kalay battaion 4, camp chu an bei zui leh bawk a, ralthuam an inneih that hleih em bakah silaimu indaih lohna avangin camp chu chhuahsan a nih thu thuchhuah siam a ni.
Military council pawlte chu PDF-Kalay battalion 4 camp chhunga fur an thil ruahman cheng nuai 500 chuang man, ei leh in, hmanrua, thlam, raltlan naupangte zirna in, clinic te chu hal chhiat vek a nih thu battalion 4 thuchhuahah tarlan a ni a.
Kalaymyop township chhim lamah April thla tawp, May thla tir lam atangin, military council sipaite leh mipui venghimtu pawlte inkarah inkahna a chhuak nasa hle a, Yi-Shin, chhak lam Siiii, Shiaaaa-Phu leh Duuu-Nwei khuaa in sang khat chuang chu military council sipaiten an hal chhe vek a ni.
Kalaymyo township chhim lama inkahna a nasat zel avangin, a tlem berah khaw 10-a tualchhung mi zawng zawng deuh thaw chu hmun him lamah an tlan chhia a. Kan hak lai nen chauha an tlan chhiat avangin, fur hun inzar hulna tur, ei tur leh damdawite an mamawh hle thu hriat a ni.
