Union Election Commission (UEC) thar kaihhruainain vawiin November ni 5 atanga ni 7 thleng awh tur Proportional Representation (PR) system chungchanga sawihona, Yangon region sorkar office-a neih tur sawmna chu NLD party telin political party 41-in tel tum lova, an hnawl thu hriat a ni.
PR system bakah inthlan dan (election system) chungchang sawiho turin UEC chuan political party pakhat theuh atangin aiawh pahnih zel tel turin ram chhunga political party 93 awmte chu chawlhkar hnih liam ta atang khan sawmna leh hriattirna a lo pe chhuak tawh a.
Chu sawmna chu military lam hnai party 52-in pawmin, tel an tum thu hriat a nih rualin NLD, SNLD leh ANP party lian telin political party 41 chuan eng chhanna mah an pek loh thu sipai leh USDP chanchin a bika ziak thin People Media chuan November ni 3 khan a lo tarlang tawh a ni.
NLD party, San-chaung township Chairman U Bo Bo Oo chuan, “PR system tia an phuah kualna chhan chu thil dang vang a ni lo. Parliament-ah hmun li a thena hmun khat ni chung pawhin sorkar an thunun zo lo a, mipui lamin ani dodala mipui party an thlawk leh tak vek avagnin, englai pawha sipai lam chak theih nan parliament-ah seat zaa 25 an lak sa bakah PR system tiin an mi leh sa awm zawng zawng chu parliament-a khalh luh an tum a ni ber mai. A awmzia chu thuneihna latu military council General Min Aung Hlaia duham luatna a ni a, a hnua amah thlaktu tur chu a fapate leh a tute an la nih theih beiseia thil tihna a ni,” tiin RFA a hrilh a ni.
U Bobo Oo hi NLD party veteran politician pakhat niin, September thlaa China Communist party leh NLD party inhmuhkhawmnaah pawh khan NLD party aiawhtu bera tel a ni.
