Rakhine State chhim leh hmar, township hrang hrangah tuilianin a chiam nual avangin thi leh hliam an awm nual thu tualchhung mi te hnen atanga hriat a ni a.
Rakhine State hmar lamah ruah sur nasat avangin thi leh hliam an awm nual a, Myauk U (Hmiauh U) leh MinPya (Min Pia) khaw inkara luang LayMyo (Li Miauh) tuipui tluana khaw 30 chuang te chu tuilianin a chim nual a, KaLaTan tuipui kuang liam vangin Myauk U township chhehvel luiah tuiin a chim nual thu hriat a ni bawk.
MinPya township, TaSi khuaa tuilian avangin August 6 khan naupang kum khat mi leh hmeichhe pakhat an boral thu hriat a ni a, a chhehvel khaw 20 chuang pawh tuilianin an chim nual bakah KyaukTaw (Chauh Taw) township-ah pawh KaLaTan tuipui kuang liam avangin khaw 10 chuangin tuilian an tuar thu hriat a ni bawk.
KaLaTan tuipui kuang a liamin a chhehvela khaw hrang hrang te tuilianin a chim avangin tualchhung mipui te an inthliar fihlim nual thu tualchhung miten an sawi a.
MaungTaw township hmar lam leh TaungGok township chhehvelah pawh tuilianin a chiam nual avangin chenna in leh leidawh te a chhiat nual thu tualchhung miten an sawi bawk a ni.
