National Unity Government (NUG) chuan ralthuam lama mipui sipaite tanpuina a pek dan kimchang sawi chhuah a tum loh laiin, tun dinhmuna ralthuam a lei khawlsa hmun 6-a thena hmun 1 vel bak PDF te hnena thawn theih a la nih loh thu leh tun hnaia ralthuam leite chu a tun laiin a thawh nat tawh zawk thu a tarlang a ni.
NUG lam chuan, “Budget sum hmuh dan azirin ralthuam lei leh PDF te hnena thawn chhuah hna chu awmze nei taka kalpui a ni a. PDF, Local PDF te hnena ralthuam sem chhuah chu ka lei tawh atang hman zat hmun 6-a thena hmun 1 ang vel chiah a la ni a, a bak zawng pawh pek tur a ni ang,” tiin an sawi a.
Indona zual kaina hmun chu ngaihpawimawh bik niin, inkah vak lohna hmun chu tlem azawng chauh tanpuina pek a ni a, a thiar velna kawngah fimkhur a tul avangin, a rei thin th upawh NUG chuan an sawi bawk ni. NUG Press Secretary Team-a Ko Ni Bone Lat chuan, Revolution atana hman tur hi thla tin US dollar maktadui 10 vel mamawh a ni a, NUG chuan theih tawp chhuahin thawhlawm a khawn zel a, Mi hausa (business owner)-ten revolution atan NUG hnena tax pe turin a hrilh a.
NUG sorkarin kum khat hmel hmuh hnuah chuan PDF te zirtir dan, ralthuam siam chhuah leh inkaihhruaina te chu a tha chho zel a, Professional Army anga inthlak danglamna pawh a awm chho zel bawk a, nakin lawkah chuan Guerilla operation zawng lo pawha Battalion operation anga indona kalpui a nih tur thu Ko Ni Bone Lat chuan a sawi bawk a.
Chubakah control area pawh Sagaing region leh Magui hmar lama kawngpui chu zaa 90 leh khawte lam zaa 80 vel thunun tawh niin, Ethnic Armed Organization (EAO) hmunah pawh control area zauh zela chak taka revolution kal pui a nih thu NUG chuan a sawi lang bawk a ni.