CRPH, NUG pawl tana sum hmanga tanpuina leh bungrua ralthuam thlenga tanpuina petute hrem an nih theih nana chanchin petu (Dalan)-te chu lawmman pek that thu thuneihna latu military council pawl zingah sawiho a ni.
Military council member U Thein Nyuint, Man Nyain Aung, U Khin Maung Shwe, Jeng Phang Naw Taung, Daw Aye Nu Sein, U Sai Lon Sai, Dr. Banyar Aung Moe leh U Shwe Chan te chuan nimin August ni 23, Naypyidaw-a military council meeting-ah lawmman pe tura rawtna a sawi chhuah thu hriat a ni a.
CRPH, NUG leh an hnuaia pawl hrang hrangte sum leh hmanraw lama tanpuitute chu anti-terrorism act hmanga hremna pek a nih theih nan chanchin (report) petute chu lamman pek an nih tur thu leh mipui hriata puanzar a nih tur thu an sawiho tih military council Information department chuan a tarlang a.
Chu bakah Dollar leh rangkachak market play kualtute man chhuak a, firfiak pawl hrang hrangte military training leh ralthuam petu ethnic armed group-te dang chat vek theih tur leh, tuna tharumthawhna thlentirtu man chhuaka hremna pek ngei a pawimawhziate an sawiho bawk . Sipai hotu Gen. Min Aung Hlai chuan CRPH leh NUG hnuaia din pawlte dan ang taka hremna pek an nih theih nan ruahmanna siam a nih mek thu leh ethnic armed group te nen pawh inlungrualna leh inremna khawih chhe lo zawnga hmalakna an neih mek thu a sawi a ni.
