Sagaing region, Sagaing township Khaw 6-ah Military council sipaiten chenna in 400 chuang an hal chhiat thu tualchhung miten Yangon Khit Thit Media an hrilh a.
April 20-24 chhung khan Military council sipaiten Sagaing township InnSa khua, MuTa khua, TaungMyo khua, San Thit khua, Ywarhtaung (Zua Thong) khua, Tabuyin Khwe (Ta Be Yin Kue) khua an luh chilh hnuah chenna in 400 vel an hal a. Heng bakah hian KywePone (Chue Pong) Phyusawhti khaw kiangah pawh Military council sipaiten hal turin an ruahman mek thu hriat a ni bawk.
Military council sipaiten InnSa khuaah In 267, MuTa khuaah In 46, TaungMyo khuaah In 16, SanThit khuaah In 37, Ywartaung khuaah In 5 an hal a, Tabuyin Khwe khuaa in hal zat hriat theih a nih loh thu tualchhung mite hnen atanga hriat a ni.
Sagaing region huam chhunga Phyusawhti khua KywePone-ah Tuitheh Kut hunlaiin Revolution pawl ten mission hna an tawhnaah hliam an awm nuala, In an hal nual thu tualchhung miten Yangon Khit Thit Media an hrilh a.
“Tabuyin Khwe khua an hal avangin mipui an tlachhe nasa hle a. Khaw dang pawh an tlanchhe nasa khawp mai. Tuitheh Kut lai a ni a, KywePone khawpum an hal vek” tiin tualchhung mi pakhat chuan Yangon Khit Thit Media a hrilh a ni.
Tun dinhmunah hian Military council sipaiten NyaungPinWone (Ngiau Pin Won) police station lamah an pan thu tualchhung mite hnen atanga hriat a ni bawk.
