Kayin State Myawadi (Miah Wa Di) district KNU Bridage 6 huam chhung Su Ka Li khuaa inkahna avangin tualchhung mi 4000 chuang tlanchhia te, vawiin thleng an awmna inah kir leh ngam lovin Taung Yin tuipui kamah an tangkhang thu raltlan tanpuitu ten an sawi a ni.
February 10-24 thleng khan Su Ka Li khuaa Thi Ka Pat Le Military council camp. KNLA, KNDO, KTLA te leh PDF tangrual ten an beih rawn thu hriat a ni.
He inkah tawnna avangin Ba Le Du khua, Maw Khi khua, Uh Ka Rih Khi khua, Thi Ka Pah Le khua, Pa Nue Phu Ka Lu khua leh Thi Te Li khua telin khaw 10 chuanga tualchhung mi 4000 chuan an in thlir fihlim thu tlawmngai pawl ten an sawi a ni.
Heng raltlante hi Thai lamin an dawnsawn theih loh avangin Taung Yin tuipui kamah an tangkhang mek a, ei in leh damdawi an mamawh hle thu security zinga hming thup pakhat chuan RFA Media a hrilh a ni.
“Min beih tirh atangin kan tlanchhia a, Military council ten chhun zanin Thlawhnain min bei reng a, kan kir ngam lo a ni. Tuipui kama kan awm rih avangin naupang leh kum upa te an damlo a, ei in tur kan nei loh avangin an hriselna a pan hle a ni”
Ni a liam zela hritlang awm na, khawsik an tam zual a, damdawi mumal a awm loh thu tualchhung mi ten an sawi a ni.
Tun dinhmun thleng hian Military council sipai ten chung lam Thlawhna atangin an beih chhunzawm zel avangin tualchhung mi te an la haw ngam rih loh thu Sin Phyu operation Battalion commander, Vice Sr. Gen. Bo Sa Long chuan RFA Media a hrilh a ni.
UN mipui chawmdawltu pawl UN OCHA ten February 23 thlenga an chhinchhiah dan chuan Military council ten thuneihna an lak, kum 2 hnu hian Kayin State-ah mi 106200 chuang in leh lo an tlansan thu hriat a ni.
