Sagaing region, Tamu khawpui chuanchung Chun Pin Ta khua atanga Tamu khuaa haw mek tleirawl mi 3 te January 23 khan Military council sipai ten an man hnuah an thah thu hriat a ni.
An thah tak te hi Chin Pin Ta khuaa kum 25 mi Ko Lei Min Than, Myoma (Miauh Mah) 14, Chhawng Nat Chi khuaa kum 23 mi Ko Swe Min Than leh kum 17 mi Ko Ngan Min Haung te an ni a. Kun Taung Military council sipai check gate-ah dawm dingin an dawp a, PDF te nen inkungkaiha an hriat avangin an man a, a sawisak hrep hnuah an thah thu hriat a ni.
Hming thup tualchhung mi pakhat chuan “Chawhnu dar 2:00 velah an man a, a hnu lawkah an sawisak thawm hriat a ni a, an khawngaihthlak khawp mai” tiin a sawi.
Mitthi chhung ten an ruang an dil pawhin ka that lo an ti a, an ruang an pek duh loh thu an chhung hnaivai mi te hnen atanga hriat a ni bawk.
Heng tleirawl mi 3 te hi eng pawlah mah inhnamhnawihna an nei lova, Bawng veng thin te an ni a, hetia boruak an tawng ta mai hi kan tuar thiam lo a ni tiin a sawi zui bawk.
Chun Taung khua hi Tamu Aung Zi Yah motor kawnga awm a ni a, Tamu khua atangin mel 8 vel hla awm an ni.
Chun Taung Military council sipai check gate hmaa pal tlang tur reng reng Bike atangin an chhuktir thin thu khualzin mi pakhat hnen atanga hriat a ni.
