Indo-Myanmar border, Sagaing region, Tamu khuaa leng lut India ram mi pahnihte chu military council hnuaia thawk Pyusawhtee pawlin July ni 5 chhun dar 1 vela an kah hlum thu Chongthu News-in a tarlang.
An mi kahhlumte chu kum 28 mi mipa leh kum 35 mi hmeichhia an ni a, anni chu civil mi panngai niin, Tamu khuaa an chhungte tlawha kal an nih thu hriat a ni.
Chung India mi, Tamil hnam pahnihte chu pawisa thleng thinte an ni a, Pyusawhtee lamin kap hlumin an pawisate an laksak a nih theih chu Tamu lam source pakhat chuan Khit Thit media a hrilh a.
Ramria awm pakhat chuan, “Pawisa thleng thinte tiin an sawi a, pakhat chuan rikshaw a khal a, thenkhat chuan anni chu Tamu leh Moreh inkara bungraw lalut thin, carrier tiin an sawi bawk a. Carrier thawktute an nih chuan pawisa pawh an thleng thin a. India lam sipaiten Moreh-ah mi an check nasa hle a, chuvangin Moreh lama awm Myanmar mite chu dawr khar sawk sawkin an tlan haw vek a ni,” tiin a sawi.
Tamu leh Moreh khuate chu ram pahnihte inpal tawna bazarna hmunpui a ni a. Tamu tualchhung mi pakhat chuan, “Ramri kana India lama dawrkai chhungkhua chu a tlem berah 300 chuang an awm a. Tuna Pyusawhtee lamin an kahhlumna chhan chu border tension neihtir an duh vang a ni a. PDF leh CDM chhungkhuate India lama awm tiharsa turin an tilui a ni,” tiin a sawi bawk a ni.
