Chin state, Tedim khuaa PDF-Zoland thuchhuah loud-speaker hmanga lo puanzarsaktu tlawmngai pawl hruaitu pakhat Ko Lian Shin Hmung chu Section 505 (A) hmanga thubuai siamsak chu a hmachhawn mek thu hriat a ni.
Tedim khaw mi pakhat chuan, “Sir Lian Shin Hmung-a case chu niminah an ngaihtuah a. Thutlukna tak chu an la siam lo. An la ngaihtuah mek a. Tunah chuan police lock-upah a awm. Leh lamah kawtlang upaten theih tawp chhuahin an tanpui bawk a ni,” tiin a sawi.
Chin mipuite venghimtu pawl pakhat PDF-Zoland chuan June ni 25-ah Tedim khaw chhunga Non-CDM education staff, boarding te, school naupang nu leh pate, khawtlang hruaitute leh sakhaw hruaitute hriattirna thuchhuah a siam chhuak a.
Chu thuchhuah chu loud-speaker hmanga puang avangin, Shalom Youth Committee member pahnih Ko Lian Shin Hmung leh Ko In Khat Mun te chu sipaiten an man a ni.
Anni pahnih chu Tedim police station-a kawl an nih hnuah Ko Lian Shin Hmung chu Section 505 (A) hmanga thubuai siamsak niin, loud-speaker dahna in neitu Ko In Khat Mun erawh July ni 5-ah intiamkamna neihtirin chhuah a ni a.
Ko Lian Shin Hmung a rawn chhuah ve theih nan Tedim khuaa sakhaw hruaitute leh khawtlang nu leh paten ngaihdam an dilsak thu hriat a nib awk a.
Section 505 (A) chu ram chhung sorkar emaw, inawpna emaw, remna tihbuai tuma mi dang, pawl tithlabar zawng, hlauhthawntir zawnga tumna emaw chutianga thiltih emaw a nih chuan kum 2 thleng jail tan leh pawisa chawi emaw a pahniha hremna pek theih a ni.
