Thailand leh Myanmar ramri Chiang Rai State, Mae Fah Luang khua atanga ruihhlo tawlh lut te leh Thai ramria Duty te April 12 khan an inkap a. Ruihhlo tawlh ru zinga mi 3 an kap hlum a. Hemi chungchangah VOA reporter Ma Aye Aye chuan heti hian a thawn a.
Golden triangle hmun atanga siam chhuah ruihtheihthil phur te leh Thai ramria duty te Thai-Myanmar ramri Chiang Rai State, Mae Fah Laung hmunah an inkap a, ruitheihthil tawlh rute zinga mi 3 an man hnuah kah hlum thu Thai sipai ten an sawi a ni.
Heng ruihhlo phur ru te hnen atangin silai, damdawi mum 160000 leh herion Kg 20 an laksak a. A hmuna en fiahtu General Suparerk chuan chanchinbu mi te hnenah hetiang a sawi.
“Ruihtheihthil tawlh rutute leh Thai ramri duty te an inkah chungchangah thi an awm a. Heng thi ta te hi an kutzungpui atangin hnu chhui theihna lak an ni tawh a, tu te nge an nih kan hre chhuak thei ngei ang. Kan ram chhungah ruihtheihthil an rawn tawlh ru fo avangin theihtawpin kan lo dang nasa a. Myanmar atanga ralthuam keng mi 7 te nen an inkap a, a hnuah an tlanchhe leh vek a ni” tiin a sawi a ni.
Ruihhlo tawlh rutute hnen atangin ralthuam leh ruihtheihthil tam tak Thai ramri duty sipai ten an laksak nual thu thuchhuah an tarlang a. Tun hnai lawk atang khan Golden triangle hmun atangin ruih phurna damdawi (Amphetamine) mum maktaduai 20 leh damdawi dang Kg 500 chuang an man tawh bawk a ni.
Golden triangle hmun atanga an siam thar hnuhnung ber Happy Water an tih ruih phurna damdawi pawh hmanni lawk khan an man thu Thai Narcotics Bureau ten press conference-ah an sawi a ni.
