Thailand ram inthlanpui General Election chu May 14 (Sunday) ni khan neih a ni a. Hriat theih chinah Move Forward Party (MFP) chuan Thailand mipui 14 Million lai vote hmuin Seat 150 chuang la tawhin an party leader Pita Limjaroenrat-a chu Thailand Prime Minister thar a nih ngei a rinawm thu beisei a ni ta.
Thailand-ah hian sorkarna siam thei tur chuan House of Representative (MP) 280 chuang neih a ngai a, Move Forward Party hian an party malin sorkarna siam thei chiah lo mah se, opposition party pakhat Seat 140 chuang hmu vetu Pheu Thai Party nen tangrualin sorkarna an siam ngei rin a ni. Sorkarna chelh mektu Thai Royal Army Chief hlui Prime Minister Gen. Prayut Chan ocha-a kaihhruai United Thai National Party chu an che chhe hle a, seat 36 bak an hmu lo a ni.
Mum 42 mi Pita Limjaroenrat-a hi Thailand-ah a graduat hnuin Harvat University atangin MBA a zo a, 2019 Thailand General Election neih tun khan MP atan than a lo ni tawh a ni. Pita Limjaroenrat-a hian Prime Minister a nih chuan US sorkarin Burma act a lo pass tawh chu tihpuitling a nih theih nan theih tawp chhuaha hmalak a tum thu a sawi a ni.
Thai opposition Party-ten hnehna an chan chungchangah Thai-a awm Myanmar miten an lawmpui hle a.
U Aung Thu Ngeing-a hmuh dan chuan Myanmar chungchangah human right leh beiseina kawng thar a awm theih nan Thai hian hmalak ngei kan beisei hle a ni tiin a sawi a.
“Ram chhung buaina chungchangah danglam em em lo mah se, human right lamah beiseina thui tak a awm thei ang a. Ramri-a raltlante tan camp sak belh leh inenkawlna chungchangah hmalak a beiseiawm hle” tiin a sawi zui bawk a ni.
Opposition Move Forward Party hruaitute thil tumah hian Myanmar rama tharum thawhna chungchanga ASEAN agreement Five common te pawh bawh zui thuai a nih dawn thu an ziak tel bawk a ni.
