Chin State, Halkha khawpui leh Thantlang khawpui inkal pawhna Timit phaizawlah Military Council sipaite leh CDF tangrualte, thla khat chhung inkahnaah Military Council sipai lam mi 60 aia tlem lo an thih tawh thu CNF ten an sawi.
Military Council sipaite hian Thantlang khawpui din thar leh tum angin Halkha khawpui leh Thantlang khawpui inkar, tualchhung mipui ten an hman tawh loh Timit Leidawh chu siam that leh tumin July 30 khan sipai 80 rual ten buk an khuar a, CNF te nen an inkah tan thu August 31 khan CNF ten an thuchhuahah an tar lang.
Timit phaizawla Military Council sipaite operation chu CNA, Chinland Jion Defence Force Committee-Special Force (CJDC), CDF-Thantlang, CDF-Zophei, CDF-Lautu, CDF-Mara leh CDF-Hakha tangrual ten, ni 31 chuang an kah rawn thu an thuchhuahah tar lan a ni.
July 30 atangin August 31 thleng, thla khat chhung CDF tangrual ten an kah rawnnaah Military Council sipai mi 60 aia tlem lo an thih thu leh hliam an awm nual thu CNF ten an sawi. He inkahnaah hian CDF tangrual pawl zinga CDF-Halkha sipai pakhatin ram tan a nunna a hlan a, mi 5 an hliam a, hlauhthawnawm an awm loh thu hriat a ni.
Tun dinhmunah hian Timit phaizawl velah CDF tangrual pawlte leh Military Council sipaite an inkap reng a. Military Council sipaite hian Kalaymyo khawpui leh Falam khawpuiah khawmual lam leh chung lam atangin an la beih reng thu hriat a ni.
