Mandalay region, Pyin Oo Lwin (Pin U Lun) township, MayMyo khawpuia chaw dawr neitu Ma PoPyi chu Terrorism Act leh Pyin Oo Lwin District Court chuan June 9 khan kum 15 an hrem leh a, a hmasaa an hrem nen kum 43, lung in an tan dawn thu Pyin Oo Lwin tualchhung miten an sawi a.
Ma PoPyi hi Terrorism Act, section 50 (j) case hmangin kum 15 leh an hmaa a thubuai awrha an hrem tak kum 28 nen Lung in an tan dawn thu Pyin Oo Lwin-a security hming thup pakhat chuan heti hian RFA Media a hrilh a.
“June 9 khan Pyin Oo Lwin district court chuan kum 15 lung in tang turin an hrem a. Tun hma khan kum 28 leh thla 6 an hrem tawh bawk a, tuna an hrem kum 15 nen kum 43 a dawn ta. A tanna Lung in sawn tum a ni a, khawi lung inah nge an khung dawn tih a la hriat loh” tiin a sawi.
Tunah hian Ma PoPyi hi Mandalay Jial-ah an la khung mek a, a pum lampang a chian loh avangin damdawi an eitir mek thu an sawi a.
Tlawmngai pawl zinga political activist Ma PoPyi hi PDF tanpuitu nia puhin leh Military council-ten thuneihna an lak hma, kum 2021, October thla pawh khan an lo man tawh a, tuna an chenna in, MayMyo khawpuia chaw dawr pawh Military council-ten an kalhsak thu hriat a ni bawk.
Political Prison (AAPP)-ten an chhinchhiah dan chuan Military council ten thuneihna an lak hnu atangin kum 2023 June 12 thleng khan mihring 23311 an man tawh a, heng zingah mi 18980 chhuah tawhin mi 6338, lung in an la tantir thu an tar lang a ni.
