Myanmar Military Council chuan National Defence and Security Committee a ko thuai dawn nia hriat a ni a, he meeting-ah hian Henry Van Thio chu a tel thei tawh ngei an rin thu Nay Pyi Daw khawpui atanga hriat a ni a.
Kum 65 mi Pu Henry Van Thio hi Myanmar Vice President pahnih zinga No.2-na thlan tlin a ni a, Aung San Suu Kyii kaihhruai NLD party ticket-in Chin state, Thantlang township atanga MP atana thlan tlin a ni a. Military council-ten thuneihna an lak Feb.1, 2021 khan Henry Van Tio hi man loh leh hren beh loh zingah a tel a, Vice President No.2 a nihna angin office pawh a la kal reng nia sawi a ni. 2022, July 31 khan Military Council chuan an term pawh sei leh tul nia an hriat avangin National Defence and Security Committee hi a ko va, he mi tum hian Pu Van Thio hi a hriselna that loh chhuanlamin a tel ve ta lo a ni.
2008 Myanmar Constitution-in a phal angin Military council hian ram chhung emergency thilah thla ruk chhung vawi 2 a thu thei a. National Defence and Security Committee-in a phal chuan thuneihna an nei thei a, July thla hi an thuneihna an term a zawh hun a ni tawh a; chuvangin National Defence and Security Committee hi an koh ngei ngei a tul dawn ta a ni.
Myanmar National Defence and Security Committee-ah hian President, Vice President 1,2, Parliament Pyithu Hluttaw speaker leh Ameotha Hluttaw speaker, Commander in Chief of Army, Vice Commander in Chief of Army, Defence Minister, Foreign Minister, Home Minister, Boarder Affair Minister te an tel dawn a ni.