Sagaing region, Watlet township Aung Chan Ta khuaah April 23 chawhnu dar 2:00 vel khan Military council sipai 60 rual ten luh chilhin chenna in 140 chuang an hal avangin tualchhung mipui 1000 chuang in leh lo an tlansan thu tualchhung miten an sawi.
Aung Chan Ta khua hi Military council sipai ten tum 2 an beihna a nih thu tualchhung security thuneitu hming thup pakhat chuan RFA Media a hrilh a.
“Khawchhungah chenna in 270 vel a awm a. Tum hmasa khan In 109 an hal tawh a, tunah In 140 vel an hal leh avangin eng mah an bang tawh lo, a khawpumin an hal mang vek tih theih a ni”
Aung Chan Ta khaw bulah hemi tuk vek hian Military council sipaite leh PDF te an inkah avangin khawchhunga chenna in an hal chhe nual a.
Hetia Military council sipai ten chenna in an hal hnu hian an chhuahsan leh thuai nain tualchhung mipuite an la kir ngam rih loh thu tualchhung mi pakhat chuan a sawi.
He inbeihna chungchangah Sagaing region, Military council thupuangtu RFA Media-in a zawhnaah eng mah chhanna a awm rih lo.
Military council thupuangtu Major General Zaw Min Tun chuan keini sipaite hian tualchhung chenna in engtikah mah kan hal ve ngai lo tiin RFA Media-ten an zawh tawhnaah a lo chhang tawh a ni.
Data For Myanmar ten March 19 thlenga an chhinchhiah dan chuan Military council sipaiten thuneihna an lak hnu kumin 2023 February 28 thleng khan Sagaing region-ah chenna in 47778 an hal chhiat tawh thu an tar lang a ni.
