Sagaing region, Ye U khuaa Military council sipaite leh Phyusawhti camp 4 an bomb-naah Military council sipai officer 2 telin sipai 10 chuang an thih thu NUG Defrence Ministry-ten an thuchhuahah an tar lang a.
May 10 zing dar 6:38 khan Ye U khawchhunga Military council sipai leh Phyusawhti 40 awmna camp-ah te, Ye U khua KyaPhu khuaa mi 7 an awmna khuaah te, Ye U khua GaWai Park hmuna mi 30 awmna hmunah 107 MM leh 81 MM-a an beihnaah officer 2 leh 10 chuang an thih bakah mi 20 chuang an hliam thu hriat a ni bawk a.
Heng Military council sipai leh Phyusawhti te hi PDF-ten kum 2-na champha hminga an beihna a ni a, PDF tangrual lamah thi leh hliam an awm lova, an hnungtlawhsan thu hriat a ni bawk.
Hetiang vek hian SweBo township khaw 3-a Military council sipai leh Phyusawhti camp, ralthuam liana an beih thu Monywa (Mung Zua) PDF (Chindwin Attack Force) te hnen atanga hriat a ni a.
May 4 zan dar 9:00 khan SweBo township, Lone Ywa (Lung Zua) khuaa buk khuar Military council sipai leh Phyusawhti te an beih hnuah May 5 zan dar 11:00 vel pawh khan SweBo township Pan Hlaing khuaa Military council sipai leh Phyusawhti camp leh OhPong khuaa Phyusawhti camp te ralthuam lianin an beih thu hriat a ni bawk.
He inbeihnaah hian MonYwa District PDF (Chindwin Attack Force) Battalion 3, Division 3, GaNong PDF leh NgaMinYah LPDF tangrualten an beih rawn a. Military council sipai leh Phyusawhti-te thi leh hliam an awm nual thu hriat a ni a, PDF tangrual pawlte thi leh hliam an awm loh thu leh an hnung tawlhsan thu Chindwin Attack Force-ten an thuchhuahah an tar lang a ni.
