Sagaing region, Yin Mar Bin township leh Salingyi township-ah Military council sipai ten January 24,25 khan khawchhung then fai hna thawh avangin khaw 13-a tualchhung mipui Sing khat chuang in leh lo an tlanchhiatsan thu tualchhung mi ten an sawi.
Yin Mar Bin township hmar lam zara khaw chhehvel leh Salingyi township khaw chhehvela awm te an tlanchhiat nual thu Yin Mar Pin township-a tualchhung mi pakhat chuan a sawi.
“January 24, zing dar 11;00 atang khan ni 25 thleng kan tlanchhia a, Thantawgyi (Than Taw Chi) khaw kiang ramhnuai thlengin an hal a, mei khu an chhuak nasa khawp mai” tiin a sawi zui.
Heng an chet rawvana leh an hal chungchangah Sagaing-a Military council thupuangtu zawhna chhangin eng mah ka hre rih lo tiin Janaury 25 tuk khan RFA Media a hrilh.
Myanmar chungchang ngaihtuahtu pawl ISP-Myanmar ten January 24-a an thuchhuahah chuan Sagaing region-ah Military council ten thuneihna an lak hnu kum 2 velah hian chenna in leh building 43216 an hal chhe tawh a ni.
UN mipui tanpuitu tangrual pawl (UN OCHA) ten chan chhinchhiah dan chuan Military council ten thuneihna an lak hnu kum 2022 December thla thleng khan Sagaing-ah tualchhung mipui Nuai 6 leh a chanve (650000) chuang in leh lo tlansan an awm tawh a ni.
