Zomi Congress for Democracy (ZCD) ram chhung Party atan an in-register dawn nge dawn lo thutlukna an la siam rih loh thu Party secretary Pu Gin Kam Lian chuan a sawi a ni.
“Kan la in ngaihtuah mek a ni, kan awmna a hla hlawm si a, inkal pawhna a harsat mai bakah zoom meeting nei tur pawhin internet a hman theih bawk si lo” tiin ZCD Party secretary Pu Gin Kam Lian chuan a sawi a ni.
Military council ten kumin 2023 January 26 khan Party register dan thar a duang a, in register tur ten ni 60 chhungin ram chhungah Party te in register tur an ti a, hun tiam chhunga in register lo te chu ram chhung Party atanga hnawl an ni ang tiin an tarlang a ni.
An dan siam lawk angin ram chhung Party in register tur hun tiam ni 10 vel chauh a duh tawh a, March 26 hian hun tiam a zo dawn a ni.
“Keini Party awmsa tan chuan harsatna a awm hran lova, kan in register dawn a nih dawn pawhin Kyats nuai 100 peka hming inpek a ni mai a. Nimahse kan chhunzawm dawn nge dawn lo kan la sawi thei rih lo” tiin Pu Gin Kam Lian chuan a sawi a ni.
Tun dinhmun thlenga ram chhunga Party in register 23 an awm tawh thu Military council ten an thuchhuahah an tarlang a. Rampum huapa vote chhuh thei Party 5 leh, State leh region huap chauha chuh thei Party 18 an awm thu hriat a ni.
