Chin State veng himtu pawl CDF-Zotung Commander in Chief leh sipai 2 te chu Military Council ten an man a, July 27 khan Chin-Magwe (Ma Gui) ramri, Ramsi khuaah an hal hlum thu hriat a ni.
Chin-Magwe ramri, Matupi township, Zotung huam chhunga Ramsi khuaah July 18, atang khan, Gangaw township atanga Military Council-te kal te chuan Khuaa la chambangte hruai chhuah tumin an innawr buai hle a, mi 3 an man thu CDF-Zotung Supreme Council-a, thu neitu pakhat chuan a sawi.
“ Ni 22 khan Military Council-te Khuaa an luh avangin tulchhung mi an biru nual a. Tlan chhuak ve lo te, eng tin nge an awm tiin ka va en a. Military Council ten ramhnuaia tawm mek mi 3 an man” tiin CDF-Zotung Supreme Council-a, thu neitu pakhat chuan a sawi.
A tihhlum tak te hi CDF-Zotung Battalion-a Commander in Chief, Paaw That Cheu, sipai Paaw Thang Cin Mang leh an Khawhotu zinga Paaw Aung Min Thang te an ni.
Military Council-te hian heng mi 3 te hi July 22 khan an man a, that nghal mai lovin an sawisak hnu, July 27 khan Ramsi khaw lu-ah an hal hlum thu hriat a ni.
A hal hlumna hmunah hian CDF-Zotung, Commander in Chief-a lukhum leh a chem ki zum pai bakah a lu-a an sawisakna chik nuai an hmu bawk. Kristian dan anga an vui liam thu CDF-Zotung Supreme Council-a, thu neitu pakhat chuan a sawi.
“Burma sipaite hian eng dan leh hrai mah zawm lova hetianga a man te hi International danah chuan thah thiang lo a ni a. Chuti lova nunna hial a zuah lo hi chu kan rilru a na tak zet a ni. Kan rinchhan ber a boral hi chu kan sun hle a, chuvangin he Revolution hi kan thlah dul dawn lo, kan che nasa zual sauh dawn a ni” tiin a sawi zui bawk.
Military Council ten helai hmuna then fai hna a thawh lai hian Ramsi khuaa tualchhung mi 30 vel an man a, August thla tir khan an chhuah leh thu hriat a ni.
Tun dinhmunah hian Military Council ten Gangaw khawpui lamah an kir leh tawh a. Ramsi, Antar khaw tiamin khaw 5 vela tualchhung mi 1000 chuang te, khawchhungah lut ngam rih lovin ramhnuaiah a la biruk thu hriat a ni.
