Martial Law puanna hmun Chin State-ah kohhrana inkhawm turin Military council hnenah chawlhkar khat hmaa phalna lak lawk a ngaih thu hriat a ni.
Military council ten February 2 khan Chin State township 7-ah Martial Law an puan tawh hnuah February 4 khan Halkha , Falam, Tedim, Thantlang, Tawngzang, Kanpalet leh Matupi township-ah zan curfew an puan bakah mi 5 aia tam lo, awm kawm an phal loh thu, thupek an chhuah tawh a ni.
He thupek an chhuah avangin Kristian Zaa 80 chuang awmna Chin State Kirstian te awmna ten harsatna an tawk a. Military council te hnena phalna la lova inkhawm an phal loh thu Falam khuaa Pastor pakhat chuan a sawi.
“An sawi dan chuan Martial Law an puan angin mi 5 aia tam, an awm chuan inkhawm phalna a dil theih an tih angin a hun leh inkhawm tur zat te kan hriattir a. An remtih hun Sunday-ah an phalna angin inkhawm tur a ni a. An rem tihna angin kan kal a tul a, phalna hmu lovin a inkhawm theih loh tihna ang a ni” tiin Pastor pakhat chuan a sawi.
Sunday nia inkhawm tur hian chawlhkar khat hma, thawhtanniah dilna an theh lut tur a ni tiin February 13 khan thu an chhuah tawh a, he thupek hi thu tih danglam a nih hma loh zawng rin tur a ni.
Tedim khawpuiah pawh inkhawm tur leh chhiat tawk chungchanga hun hmang turin Military council te hnenah dilna an theh lawk thin thu Tedim khuaa tualchhung mi pakhat chuan a sawi.
“Mitthi vui hun leh a kal tur zat te, Inneih hun tur thlengin chawlhkar khat hma dil lawk a ngai a, kan dinhmun hi sawi thiam a har khawp mai” tiin Tedim khuaa mi pakhat chuan a sawi.
Chin State-a an harsatna chungchangah Pastor pakhat huan “ Kohhran inkhawmpui pawh zalen takin kan hmang thei dawn lo a ang a, a lungchhiatthlak khawp mai. Tunah mitthi 2 an awm a, chhung te an nih pawhin kan kal hlei thei lo” tiin Pastor pakhat chuan a sawi.
Military council ten February 1 atanga thuneihna an lak kum 2 hnuah thla 6 dang thuneihna pawh sei leh a nih hnuin Military council te an chet nasatna Chin State telin township 37-ah February 2 atang khan Martial Law an puang a ni.
Chin State, township 9-ah Paletwa tel lovin township dang 8-ah Martial Law an puang a, boruak a tang chho zel nia hriat a ni bawk.
