Chin State, Mindat township, Matupi leh Mindat Motor kawng-a mel ban 25-naah nimin tuk, zing dar 8:00 atangin tlai lam dar 1:00 thleng CDF-Mindat leh Military Council-te an inkah nasat thu hriat a ni.
CDF-Mindat-a News and Information Director Salai Ha Um chuan “Dar 5 chhung vel kan inkap a. Ruah a sur vangin chum a pik mup bawk si a, Military Council lam thi leh hliam zat kan hre thei mai lo”
May 7, zing 9:00 vel atang khan CDF-Mindat leh Military Council-te inkahnaah Military Council lam mi 1 a thi a. Mel ban 32-naah pawh tlai lam dar 5:00 vela an inkahnaah Military Council lam mi 1 a thi.
Heng bakah hian mel ban 30/31 bulah pawh May 7, zing dar 11:00 atangin chhun dar 12:00 inkarah Military Council-te leh CDF-Mindat-te an inkap a, Military Council lam mi 5 an thi a, hliam an awm nual thu a sawi.
Military Council-te hian Mindat-Matupi inkar mel 40 vela hla, kawng kama chenna in an hal chhiat bakah chenna in an rawk a, bungrua man to an laksak nual thu a sawi zui.
May 8, khan Mindat leh Matupi inkar motor kawng, mel ban 27,28 bula Military Council-te kal lai chu CDF-Mindat-te Bomb kam an chil puah avangin Sipai Motor a chhe nual a, ruah a sur avangin thi leh hliam zat hriat theih a ni lo.
Military Council ten sorkarna an lak hnu hian Chin State-a Military Council-te leh CDF-te inkahna avangin tualchhung mi 36300 vel in leh lo an tlansan thu United Nation OCHA Myanmar chuan May 6 khan thuchhuak a siam.
He inkahnaa thi leh hliam te hi Military Council ten an thuchhuahah an tar lang rih lo.
