Chin state chhim lam Paletwa township-ah mipui sipai (people’s army) din tumin thuneihna latu military council-in ruahmanna siamin khaw khat atangin a tlem berah zaa 15% vel mipui hming list a lak thu hriat a ni.
Paletwa twonship-a awm battalion 289 Commander chuan Paletwa khaw bul vela awm khaw 9-a thuneitute chu November ni 26 khan a ko va, mipui sipai din a nih theih nan khaw tin mipui tam leh tlem dan azirin khaw khatah mi 15 atanga 30 thlenga hming ziah luhtir a, December ni 3 chu hun tawpa dah a, chung hming list theh lut tura thu a pek thu, tualchhung mi pakhat chuan heti hian a sawi a.
“Battalion 289 commander-in meeting a ko a, mahni khua theuh a him theih nan mipui sipai din turin a sawi a. Khaw mipui tam leh tlem dan a zirin, kan khuaah chuan nghet atan mi 10 vel, volunteer atan mi 20, an vaiin mi 30 vel hming a lak tir a, chu chu theh luh ngei ngei tur a ni.”
Thuneihna latu military council chuan Paletwa township chhunga khua zawng zawngah mipui sipai din tumin hma a la mek a, tunah rih chuan Paletwa khaw bula awm Auh-mi-letwa, Laung-Ka-Du, Sein-Sin, Nga-Pui, An-Khu, Si-Pha-Laung, Tamang-Ta, Kin-Wa leh Kyaw, khaw 9-ah din hmask a ni dawn a.
Chu mi atan kum 18 atanga kum 50 inkar khaw mite hming chu battalion 289 commader hnenah pek luh tur a ni a, chu mi hnuah mipui sipaite tana basic military training chu pek a ni dawn tih hriat a ni.
“Hming list kan pek tawh chuan anni chu kan khuaah lo kalin basic military training min rawn pe dawn niin an sawi a. Mipui sipai tih hian chi hnih a awm a, a nghet leh volunteer a ni a, a nghet 10 an awm chuan volunteer 10 an awm bawk ang a, mahni khua atan ralthuam mamawh a nih pawhin min pe dawn a niin an sawi bawk a, a tul loh chuan min pe dawn lo tihna a ni.”
Paletwa township hi tun hma Arakan Army (AA) leh military council sipaite inkahna hmun pakhat a ni a, Paletwa khaw chhung leh Sami khuaah raltlan sang chuan an la awm reng a.
Tunah chuan Paletwa township-ah Arkan Army leh military council sipai inkarah inkahna chhuak tawh lovin, a rawn ral muang ve deuh tan a, chuvangin, Paletwa khuaa raltlante chu military council-in pawisa tlem azawng pein, an khaw lamah a hawtir hlawm a, chutih rualin mipui sipai a din tumin military council chuan ruahmanna a siam leh nghal bawk a ni.
