India atanga raltlan hawng kir leh mi 500 vel te ei in an harsa hle

0

India Mizoram atanga Chin State, Paletwa township Myeikwa (Meih Wah) khuaah February chawhnua raltlan rawn kir mi 500 vel te ei in leh silhfen an harsat thu tualchhung mi te hnen atanga hriat a ni.

Kum 2022 September 2 khan Paletwa township, Myeikwa khaw kiangah Military council sipai ten Thlawhna leh ralthuam liana an kah chiam avangin tualchhung mi 500 chuang India, Mizoram State-ah an raltlan hlawm a ni.

Mizorama an raltlan lai hian chhawmdawlna an dawn that loh avang leh tawng an thiam loh bakah hnathawh tur an harsat avangin February thla chawhnu khan Myeikwa khuaah an haw kir leh a ni.

Ei in zawn leh ramhnuaia thing kih, raw sah leh rawtuai khawrh dawn mah se, bomb kam rah puah a hlauhawm avangin hna an thawh ngam loh thu Myeihwa khua raltlan haw kir leh mi pakhat chuan a sawi a ni.

“Tunah chuan ei in tur kan nei lova, kan thlenna thla 6 vel a ni tawh. Eng mah tih theih kan nei tawh lova, rawtuai khawrh, thing lak leh raw sah dawn pawhin bomb kam rah puah kan hlau bawk sia, a harsa khawp mai” tiin a sawi a ni.

Kan awmna ngaiah kan kir leh na a, thlai chin leilet siam leh turin sum lu kan nei bawk si lo, a harsa khawp mai tiin tualchhung mi pakhat chuan a sawi a ni.

Harsatna an tawh chungchangah tualchhung mi ten Paletwa khuaa Military council hnenah tanpuina an dil thu tualchhung mi ten an sawi a ni.

Heng chungchangah hian Chin State Military council thupuangtu U Tan Zin, RFA Media ten an phone-naah chhanna an la awm rih lo a ni.

Myeikwa khuaa raltlan te hi India, Mizoram State-a Tapongchi khua, Ywatit khua, Laitlang khua leh Ywataya khuaah an awm a. Heng zinga mi 500 vel, an khuaah an kir leh a, mi 200 chuang vel India lamah an la awm rih thu hriat a ni.

Share.

Leave A Reply

Exit mobile version