The Tahan Po
Sagaing region, KawLin township, Khanta circuit huam chhungah Military council sipaiten tualchhung mi 8 an man hnuah an that thu Kawlin Revolution-KR-a thuneitu pakhat chuan a sawi a.
Mi 17 an man zingah mi 8 an boral a, mi 5 an chhuah leh a, mi 4 erawh tualchhung mipuiten an zawn mek thu hriat a ni a.
May 28 atanga June 3 thleng khan Military council sipaiten Khanta circuit huam chhungah khaw tin lut chhuakin chenna in an rawk a, tualchhung mipuite an man hnuah an thah thu hming thup pakhat chuan Mizzima Media a hrilh a.
“Mohma khaw mi 6 an man a, hmun pakhatah an sawisak lai kan hmu a. InPinHla leh UMinKone khaw inkara Bike chuang kum 35 mi Ko Kyawthu (Chaw Tu) chu Military council sipaiten an that ringawt” tiin tualchhung mi pakhat chuan Mizzima Media a hrilh a ni.
Military council sipaite hian a chhehvel khaw hrang hrang a bei chhunzawm zel a, He inbeihnaah hian Military council sipai 2 an thi a, 13 an hliam bakah ralthuam tam tak an laksak a, PDF sipai San Lin chu ram tan a nunna a hlan thu KawLin district 1, Kawlin People Defence Force-KLPDF-te hnen atanga hriat a ni.
Military council operation-ah hian Khah Mah Yah (LIB) 369 Battalion-ten Kawlin township chu June thla tir atangin operation an nei a; June 4 chawhnu dar 3 vel thleng khan inbeihna a nasa hle a, Military council sipaiten khawchhungah Jet Fighter-in an bomb chiam thu hriat a ni bawk.
st
