Sagaing region, Khin U township-a khaw 6 -ah Military council sipai ten chenna in 500 chuang an hal chhiat thu Khin U township News pawl te leh thuneitu ten Yangon Khit Thet Media an hrilh a ni.
February 11-13 khan Military council sipai ten Khin U township-a Talat Sein khua, Saw Gyi khua, Kuan Taing khua, Min Tan Gyi khua, Letpanhla (Let Pan Hlah) khua leh Laungsi khuaa In 500 chuang an hal chhiat thu hriat a ni.
Military council sipai ten Letpanhla khuaa In 200 chuang leh buhfai Tin 1000 chuang a kang ral a. Laungsi khuaah In 200, buhfai Tin 1000 chuang leh buhdenkhawl te a kang ral a. Tanat Sein khuaa Thlam 2, Saw Gyi khuaa In 11, Kyuan Taing khuaah in 1 leh Min Kan Gyi khuaah in 33 an kan ral thu hriat a ni.
February 8 khan Military council sipai ten Ye U township, Khin U khawpuiah luhchilhin khaw 10 aia tlem lovah operation an nei a, khaw 6-a In 500 chuang In an hal kang a. Military council sipai te hian Laungsi khua an chhuahsan a, Chaungsone (Chhawng Sung) khua an bei leh a, Magyitone (Ma Chi Tong) Phyusawhti khuaah an pan thu hriat a ni.
Military council ten thuneihna an lak hnu atangin vawiin thlengin Khin U township, khaw 66-ah in 4000 chuang an halchhe tawh a, tualchhung mipui in leh lo tlansan 15000 chuang an awm tawh thu Khin U township News leh thuneitu pakhat chuan a sawi a ni.
